الأس الهيدوجيني والبشرة

أهــــلا أهــــلا

موضوعنا اليوم شوي علمي لكن بحاول ابسطه على قد مااقدر وتقدرين تبحثين عن الموضوع اكثر من مقالات علميه وكتب علميه بقوقل متوفر للجميع ومجانا

كمثال لمقاله عن هالموضوع اضغطي هنا

 كل يوم نغسل بشرتنا ونرطبها ونحط كريم حمايه .. وكل وحده مننا عندها طريقتها بالعنايه ببشرتها من روتينات صباحيه و مسائيه وماسكات جاهزه او عضويه من البيت سواء من منتجات سطحيه عالبشره او نظام غذائي ، طيب هل فكرنا ليه نختار هالمنتج على منتج ثاني وليه في منتج مايعطي نتيجه و في منتج لقيتي فيه نفسك او ليه البعض الخضار يفيدهم والبعض الآخر يفيدهم اللحوم

 هذا كله له علاقه بشي اسمه الأس الهيدورجيني. وبالانجليزية يعرف بحرفين يكتبان بالطريقة التالية: pH. الحرف الأول يكتب صغيرا والثاني كبيرا. وهما حرفين اختصار لكلمتين: Potential Hydrogen. وهو مقياس رقمي يبدأ من رقم 0 الى 14، ويمثل 7 الاعتدال بين الحموضة والقلوية. كلما قل الرقم عن 7 زادت الحموضة. وكلما زاد الرقم عن 7 زادت القلوية

 بس ايش علاقته في البشره وكيف نفهم أكثر بشرتنا من خلاله عشان نقدر نحسن الاختيار مستقبلا ؟ pH الحين صار واضح ايش يعني

الطبقه الخارجيه للبشره وظيفتها  الحمايه من العوامل الخارجيه و البكتيريا اللي تضر البشره ،فتتكون من طبقه خارجيه اسمها “العباءة الحمضية للبشرة” أو بالانجليزية – acid mantle– وهي نتاج أشياء كثيرة مثل افرازات الغدد المختلفة بالبشرة مثلا افرازات الغدد الدهنيه وأيضا افرازات البكتيريا الموجودة طبيعيا على سطح البشرة و افرازات غدد التعرق لحمض اللاكتيك وامينو اسد يتكون هالغلاف على  البشره ،البشره الصحيه تكون معدلها بين ٤.٥ و ٦.٥ يعني مايله للحمضية وتختلف فكل منطقه فالبشره والرجال يختلفون عننا بانه نسبتهم اعلى 

فمثلا اغلب الصوابين نسبة القلويه عندهم عاليه ٩ الى ١٠ و تختلف من شركة لثانيه فاستخدامها تخرب الاسيد منتالي (العباءة الحمضية) وهالشي يخلي بشرتك معرضه للعوامل الخارجيه من جفاف او حب شباب او تجاعيد او غيرها فيفضل استخدام الغسولات اللطيفه واللي نسبة بي اتش معتدله الى حمضيه للحفاظ على توازن البشره و زياده استخدام المنتجات اللي فيها نسبة حموضه عاليه مثلا احماض الفواكه الل نسبها عاليه نفس اللي تكلمت عنه بموضوع هيدروكسيات اضغطي هنا ، يخرب التوازن و ممكن تسبب لك مشاكل ، لكن في كل الاحوال المنتجات اللي بالسوق تكون معدله مكوناتها بحيث تناسب الاستخدام اليومي فاغلب المنتجات اللي شركاتهم معروفه تكون حريصه على اختيار مكونات مناسبه .

 sodium laureth sulfate مثلا

موجود ضمن مكونات كثير من  الشامبو و الغسولات  نسبه القلويه عالي يوصل ل ١٠

 يسبب الجفاف للبشره و الشعر لكن حاليا اغلب الشركات صارت منتجاتهم خاليه من السولفيت

او مثلا صبغات الشعر توصل نسبه القلويه ١١ عشان كذا كثير صار في صبغات خاليه من الامونيا

لكن بكل الاحوال البلسم و الماسكات للشعر فيها نسبه حموضه ترجع توازن الحموضيه للشعر و المرطبات كذلك

.الحمضي  pH  فنرجع نأكد انه البشره الصحيه والشعر الصحي يميل لل 

هل العمر له دور بالتأثير على توازن نسبة الحمضيه  او القلويه للبشرة ؟

الأطفال نسبة البي اتش متوازن تقريبا ٧ ومع تقدم السن و زياده الشعر بالجسم يتغير نسبة الحموضيه او القلويه للبشره فمثلا المراهق بشرته تختلف عن اللي عمره ٦٠ لان كل ماكبر الواحد بالعمر تبدأ تصير قلويه وممكن توقف على النسبه المتوازنه ٧ لكن معروف انه النسبه الصحيه للبشره لنضاره و اشراقه بين ٤.٥ و ٦.٥ يعني تقريبا ٥.٥ ..فكل مازاد الواحد بالعمر تبدأ التجاعيد بالظهور  عشان كذا احماض الفواكه مناسبه في هذا العمر مثلا فيتامين أ وغيرها

كيف اخلي بشرتي صحيه او ارجع توازنها ؟

اختاري منتجات مناسبه لبشرتك و متوازنه ، لا تتعبين راسك كثير لان بالعاده اذا بشرتك صحيه و ماتعانين من مشاكل وكانت قريبه من نسبتها الصحيه ٥.٥. لو غسلتي وجهك فقط بمويه او بغسول ترتفع نسبه بشرتك للقلويه لكن لانها ارتفاع بسيط فبشرتك تلقائيا ترجع لنسبتها الصحيه ٥.٥ بدون ماتعملين شي هذا اذا ارتفاع بسيط وبشرتك ماتعانب من مشاكل لكن لان كل وحده مننا تستخدم منتجات غير فممكن تكون بشرتك بنسب القلويه و بعييده عن النسبه الصحيه فصعب انها ترجع لنسبتها الطبيعيه بهالبساطه لازم منتج يساعد هالشي و تاخذ وقت لعلاج هالمشكله وعشان يرجع يتكون العباءة الحمضية

مثلا اللي تعاني من حب الشباب مثلي قاعده تستخدمين منتجات لعلاج هالحب شباب فغالبا تكون فيها احماض مثل سالسيلك اسيد و غيرها و بشرتك ماطلع لها حبوب الا لانها صارت قلويه وقاعده تحاولين ترجعينها بنسبها الطبيعيه فتحتاجين علاج لمدة عشان يبدأ يتكون الاسيد منالي الطبقه الحمضيه بسطح البشره بمعدل تقريبي ٣ اسابيع و هذا باستخدام حريص و باتباع خطوات معينه فلو استخدمتي مثلا بهالفتره فيتامين سي انتي زودتي نسبه الحموضه اقل من الطبيعي فتصير في ردة فعل عكسيه و يزيد حب الشباب ، لذلك كل حاله تختلف   pH عن الثانيه ماينفع تقولين غسلي وجهك بصابون و انتظري كم ساعه بيتعدل مستوى ال

وبعد ساعتين استخدمي فايتامين سي هالتكنيك مايناسب اللي تعاني من حب شباب او الي اصلا تستخدم منتاجات كلها احماض فواكه لان بيزيد المشكله .

باختصار زياده مستوى القلويه او تقليل مستوى الحموضه عن النسبه الصحيه بين ٤.٥ و ٦.٥ بيسبب مشاكل للبشره و بيدمر العباءة الحمضية اللي هي سبب لنضاره البشره و رطوبتها و المنظر الصحي فتصير البشره شاحبه

حب الشباب وعلاقته في توازن البشره

فاذا زاد افراز الدهون لسبب من الاسباب الاس الهيدروجيني اذا كان بالنسبه الصحية للبشره ٥.٥ فهو يساعد بالتحكم بالبكتيريا المسبب لحب الشباب و تصير تحت السيطره لكن اذا بدأت البشره تصير قلويه فوق ٧  سواء من منتجات او أكل اوغيرها فتصير البكتيريا نشيطه في البيئه القلويه و يصعب السيطره عليها الا بمنتجات خاصه لحب الشباب .

مثال على منتجات طبيعيه حمضيه خل التفاح العضوي و الليمون

لكن لازم الحذر ليه ؟ الليمون نسبة الحموضه تقريبا ٢ يعني جدااا حمضي و قوي عالبشره فممكن يسبب حمار و التهاب فيفضل يخفف او  يستخدم في وقت مو قاعده تعالجين بشرتك بشكل مكثف بعلاجات حب الشباب ، لكن جددا مفيد للبشره الدهنيه لان تكون بشرتهم قلويه والليمون يعالج البشره و يرجعها لمستواها الطبيعي واللي يتابعني يعرف كيف احبهم فالخلطات الطبيعيه و انا بشرتي مختلطه .

مضادات الشيخوخه و توازن البشره 

مضادات الشيخوخه و مضادات الأكسده مثل فيتامين أ و سي و آي و الشاهي الاخضر و غيرهم يساعدون الخلايا بالتغذيه اللازمه مثلا كانتاج كولاجين و بالاضافه انهم يساعدون البشره بالحمايه من العوامل الخارجيه اللي تاكسد البشره او تضرها مثلا الشمس و غيرها

فيتامين سي جدا مهم للحفاظ على نضاره البشره و توحيد لون البشره لكن ماينفع يستخدم مع منتجات ثانيه حمضيه اللي ممكن تسبب مشاكل للبشره زي ماذكرت فوق اذا استخدمتيه من علاج حب الشباب بيزيد حب الشباب لان نزلتي عن المعدل الصحي وصار حمضي اكثر

بالاخير معلوماتي في هذا المقال بعد بحث علمي ومجهود شخصي لكن هو بحر اوسع من مقالاتي وتقدرين تبحرين فيه من خلال قوقل و الاهم اتمنى اعطيتكم فكره بسيطه عن الموضوع و اذا حبينا نتعمق اكثر في كمان أكلات تاثر على هالنسبه وممكن تصير اكثر قلويه و هالشي يسبب حب الشباب او جفاف او غيرهم هذا علم ثاني واسع لكن كل مافهمتي و تثقفتي يصير اختيار نمط لحياتك اسهل و امتع وصحي واذا عجبك الموضوع وحابه نتكلم عن الاكلات المفيده و غيرها اتركي تعليق تحت هالصوره .

شكرا