أهــــلا أهــــلا
من العنوان واضح اني اول مره بجربهم وبالعاده اجرب الشي لحالي لفتره واذا عجبني اقولكم لكن حبيت اغير وآجرب معاكم أخذت الخلطتين من يوتيوبر مغربيه بحط رابط الفيديو نهاية التدوينة.
لكن للمعلوميه دايما احب اشاركم بالفيديوات اللي تعجبني في تويتر .
أول واحد هو زيت معالج للسيلوليت
المكونات
١- زنجبيل طازج مقطع لقطع
٢-مسمار حب
٣-فلفل اسود حب
٤-كمون حب
٥- آعواد قرفه
٦-زيت اللوز
٧-زيت السمسم
٨-زيت اكليل الجبل
الطريقة تحطينهم كلهم بزجاج محكم الاغلاق و تخلينه اسبوع كامل بعدها تصفين الزيت و تستخدمينه يوميا على المناطق المرغوبة و ممكن تستخدمينه قبل النوم مع كريم الجسم .. شخصيا آفضل كريم جسم خالي من العطور وعضوي .
مثلا أنا بستخدمة مع كريم النمر (اضغطي هنا )
من بعد ما نزلت هالكريم ومكوناته فجآة كل آحد عنده حساب للبيع بدأوا يبيعونه الشي الحلو اني قدوة والآحلى انه كثير استفادوا .. هي مو فكره جديده موجودة منزماان لكن كانت غير معروفة الين ما انعرضت اول مره بحساب أوتاد.. لمن تشوفينهم يستخدمون نفس اقتراحاتك بالزبدات يعني نفس الشركات لان لو تلاحظون انا مختارة شركات مختلفه للزبدات تعرفين انك بالطريق الصحيح ومن نجاح لآكبر فشكرا مقدما لكل مين اعتبرني قدوة ووثق باقتراحاتي سواء عبر عنها او بصمت
الخلطة الثانيه عبارة عن ماسك للوجه لكن مثلج
المكونات
١- نص عصير ليمون و نص قشر الليمون
٢-نص بطاطس مبشوره(اضافة من عندي بل البرتقال لان ماكان متوفر)
٣-قطع خياره كامله
٤-شوي من الزنجبيل الطازج المبشور
٥- علبة زبادي
الطريقة تخلينهم كلهم بخلاط و توزعينه على علبة مكعبات الثلج او ايش شكل تحبينه و حطيه بالفريزر
وكل يوم خذي قطعه مثلجه و مرريها على الوجه كامل
رأي كانطباع أولي:
فالبداية مره بارده و فجأة تحسين وجهك احتر كانك كبيتي مويه حاره عليه .. آكيد مفعول الزنجبيل و البطاطس خليته ٥ دقايق و غسلته اللي لاحظته انه فعلا كل الزوان انشال وأنا ماعندي مسام واضح لكن المسام عندي شبه اختفى و بشرتي ماتحسست رطبت بشرتي بزيت الارغان و بعد ٥ دقايق الحراره اختفت .
هل بستمر استخدمه ؟
أكيد
هل برجع اسويه ؟
اكيد بس ممكن اغير البطاطس و اخليه برتقال و بخفف الزنجبيل عشان يلائم بشرتي أكثر .
