أهـــــلا أهـــــلا
وأخيرا جا الوقت اتكلم عن ارثلي Earthly (البراند الخاص فيني للمنتجات العضويه للعنايه بالبشره)
المنتجات نفسها دايما موجوده لكن نزل بشكل حصري بتغليف مميز وسميته لوكجوريا للاشخاص اللي زي يحبون تغليفات مميزه و الحمدلله انتهت جميع الكميات خلال اسبوعين وان شالله يرجع ينزل مستقبلا .
اليوم بحكي عن طريقة الاستخدام لكل منتج او كروتين
نفتتح الموضوع باحلى سنفره قهوة وخليناه صورة الموضوع ممكن تجربينها اشـــــايــــــا من وجهة نظري ووجهة نظر اللي جربوها وعلموني برايهم وادمانهم لها ، هو عباره عن قهوة مطحونه خصيصا في مطبخ الجمال ارثلي ، مكون من اعشاب وبودرات عضويه ١٠٠٪ مثل الكركم ، الماتشا و حليب الماعز وبودرة الروزهيب وغيرها ، الهدف من هالسنفره ازاله الجلد الميت ، تحريك الدوره الدمويه وتخفيف السيلوليت ،توحيد لون البشره ، بعد هالسنفره مااظن بيملا عينك سنفره ثانيه . يعني باختصار منتج علاجي اكثر من دلع رغم انه بشرتك بعده بتحس انها متدلعه .
طريقتي بالاستخدام :
اخذ ملعقتين او ٣ من اشــــايــــا بصحن و اضيف له مويه شوي مع ليمون او زبادي او فريهي ، يخليه كريمي سهل التوزيع والكميه تصير اكبر ونصيحتي لك سويها مع اي سنفره عضويه بتلاقين الدعك احلى ونتيجه افضل ، في بنات يحبون يستخدمونه زي ماهو لكن انا احب اتفلسف ، وزعيه على بشره جافه او فيها ماسك الجسم فريهي بحركات دائريه من اطراف الرجل لفوق ، اتركيه من ١-٥ دقايق او اكثر لكن مين عنده وقت ، وبعدها تحممي بمويه او صابون جسم مثلا الصابون المخفوق من ارثلي ولاتنسين ترطبين بزيت ارثلي او كريمك المفضل .
ماسك فريهي
ماسك فريـــــهي للوجه : من احلى الماسكات لكن م الاحلى بالريحه دايما المنتجات العضويه الفعاله ريحتها صعبه ، يحتوي على الرز والحليب والروزهيب والكركم والاعشاب العضويه اللي تساعد بتوحيد لون البشره ، علاج التصبغات ، شد الوجه وعلاج حب الشباب ، مكوناته مليانه فيتامينات و معادن يعني عباره عن منتج علاجي .
طريقة الاستخدام :
تاخذين ملعقة من الماسك و تخلطينه بمويه او زبادي او مويه ورد وتوزعينه على كامل الوجه حتى تحت العين و الرقبه و تتركينه بين ٥-١٥ دقيقه و تغسلينه بالمويه .
للبشرات الدهنيه تقدرين تضيفين له خل تفاح عضوي وطين هندي و قولي مع السلامه للحبوب
اللي حابه تدلع نفسها زياده تقدرين تضيفين ملعقه كاكو “شوكلاته غي محلاه” وزبادي مره مناسب قبل المناسبت يشد الوجه .
ماسك الجسم فريهي : المكونات طبعا تختلف في اضافات و نسب المكونات غير لان بشره جسمنا تختلف مثلا مضاف له من الاعشاب خشب الصندل و عرق السوس لمفعول تبيض و توحيد لون بشره اقوى ،يعني باختصار منتج علاجي .
طريقة الاستخدام:
يخلط ملعقه كبيره مع ليمون او زبادي او مويه ويوزع على بشره نظيفه “يعني غسلي جسمك قبلها بالصابون ” ويترك من ٥-١٠ دقايق و غسليه بالمويه او لمن ينشف حطي فوقه سنفره اشايا و افركيه بحركات دائريه بلطف ، وبتشوفين كيف بشرتك تلق لق … تقدرين تستخدمينه يوميا للمناطق الحساسه او الابط وبعدها رطبي بزيت ارثلي او كريم النمر او زبدة الجسم كريمك المفضل .
زيت الجسم من ارثلي
زيت الجسم نزل حصري و لأول مره في هاذي المجموعه الجميله لكن ان شالله بينزل كمنتج مستقل ، حجمه كبير ٢٥٠ مل ، يعني يكفي و زياده لفتره طويله ، مكون من زيوت عضويه خام ١٠٠٪ , غني بزيوت مغذيه بالفايتامينات مثل بذور العنب وبذور زهرة الشمس وزيت الجوجوبا وزيت الافوكادو و زيت جوز الهند ذو تركيبه يمتصها الجلد سريعا برائحة عطريه خفيفه .
طريقة الاستخدام :
يقدر يستخدم اي وقت بعد الاستحمام و لانه عضوي يفضل عدم تعرضه للشمس ويمكن استخدامه لكل الجسم .
الصابون المخفوق Whipped Soap Scrub
صابون السنفرة المخفوقه *** اصدار محدود** ٢٥٠مل بينزل ان شاءالله كمنتج رسمي بتغليف المعتاد .
صابون مخفوق بحبيبات السكر ترفة ومليئة بالرغوة ، لطيف على البشره ، تحتوي على زيوت عضويه وزبدة الشيا لترك بشرتك رطبه ناعمه برائحة المسك الوردي.
طريقة الاستخدام :
تستخدم على بشره رطبه او مبلوله ويمكن استخدامها يوميا ، بديل جميل للشاور جل خاصه انه يحتوي على مكونات عضويه .
سنفرة ارثلي The Scrub
سنفرة الجسم بملح البحر والسكر و الزيوت العضويه بعدة روائح ، مكوناتها ١٠٠٪ عضويه بدون اي اضافات كيماويه .
المنتج نزل فترة و حاليا انقطع فنزل بشكل حصري مع مجموعة لكجوريا ، لين الحين الطلب عليه كبير فاحتمال يرجع مره ثانيه لكن لسه ماقررت اذا اخليه منتج رسمي او لا ، رغم انه بيكون اضافه جميله اذا نزل معاه زيت الجسم بنفس الروائح اللي كانت متوفره ، سحبته من ارثلي لان التعليب ماعجبني ماحسيته عملي رغم انه كان مطلوب ، فاحتمال اتغاضى عن ايش يعجبني وايش مايعجبني وارجع انزله مره ثانيه .
طريقة الاستخدام :
هذا المنتج تحديدا في عطر زيتي خاص للجسم بصناعه الصابون والكريمات ، فاللي بشرتها مره حساسه من البرفيوم مايناسبها من هالمجموعه غير BASIC اللي هو بدون ريحة ، مناسب للاستخدام ١-٣ مرات بالاسبوع ، مرره زيتي المنتج وبيترك بشرتك مترطبه فانتبهي بالشاور ماتتزحلقين .
طريقة استخدام المجموعة :
اشـــــايـــــا ممكن يستخدم ٢-٤ مرات بالاسبوع و قبله على بشره نظيفه تقدرين تحطين ماسك الجسم فريهي ١٠ دقايق لين ينشف وبعده وعلى جسمك الماسك تفركين اشايا فوقه ، تغسلين بالمويه وممكن تستخدمين الصابون المخفوق و لاتنسين ترطبين مع الزيت كل الجسم . تقدرين تحطين ماسك فريهي على كامل الوجه قبل الاستحمام و اثناء الاستحمام و اخر خطوة تغسلينه مع كامل الجسم كذا اختصرتي وقتك و حطيتي ماسك للوجه و الجسم ،، بالنسبه لسنفره ذا سكرب لمن تحسين تحتاجين ريحة حلوه و نتيجه حلوه استخدميه .
