عروستي

أهــــلا أهـــلا

مبرووك لكل عروسة و الله يتمم لك على خير و عقبالك ياجميلة يارب يرزقك باللي يستاهلك

موضوعي ممكن يكون مفيد لك او لا لكن بحكي عن طريقتي

الزواج قسمة و نصيب و اللي ربي يشوفه خير لك بيصير ، التوكل على الله و النيه الصافيه بتوصلك لكل شي تتمنينه .

يوما ماانا كنت زيكم محتاره و مااعرف وين أبدأ وكيف اقسم احتياجاتي و اصلا ايش احتاج كعروسه خاصه اني كنت اشوف دايما مواضيع ” تجهيز العروسة” الين مافعلا صرت عروسه و تزوجت عرفت انه الموضوع مهولين فيه ، الشي الوحيد اللي فعلا تحتاجين تجهزين له هو يوم زواجك فقط ونفسيتك لحياة زوجية سعيده باذن الله بالشخص المناسب و اللي يستاهلك ، و اذا انتي انسانه تهتمين بنفسك خلقه و اظن حاليا مافي بنت ماتهتم بنفسها مايحتاج افلام العنايه قبل الزواج و الخلطات الحوسه و الضغط النفسي ،هالموضوع ينرفزني لان تحسين كنتي بكهف و الزواج بيطلعك منه ، المفروض كانثى بزواج او بدونه انتي مهتمه بنفسك لنفسك و لسعادتك ، انا اذكر كويس قبل زواجي بشهور و اصلا قبل بسنين احب العب رياضه و كنت صحيه و تعرفوني بالعناية ، و قبل زواجي فعليا بشهر فجاه سمنت من السترس ، و ندمت طبعا لان كل السترس اللي حسيته كان ماله داعي ابدا ، و انقهرت لان فستاني كنت مصممته خاصه لشكل جسمي قبل مااسمن لكن ماشاللله كان كل شي زي مااتمنى و احلى .

الموضوع بعبتره نصايح مني لكم كأختكم حتى لو انها معلومات عامه وممكن انتي قاعده تسوينه لكن غيرك ممكن مايسويها او ناسيتها

من ناحية العناية

١-اذا عندك مشاكل في بشرة وجهك من الحين عالجيها روحي لدكتور بشرة يعطيك روتين لبشرتك و اذا مبسوطة بروتينك لاتغيرينيه

٢-عندك مشكله فجسمك تصبغات او سيلوليت او ترهل كمان روحي لدكتور جلدية و عالجيها من الحين و الاهم اذا كسوله تعملين سنفرات و ماسكات فالبيت خذي باكج حمام مغربي باي صالون تحبينه او اعمليهم الاثنين .

٣- رياضه الحين و باسرع وقت ، الرياضه تنشط الدورة الدمويه وتغير النفسيه و تريح الاعصاب و تحسن بشرتك ويغير شكل جسمك

٤- اشربي مويه كثييير

٥- ماسويتي ليزر لين الحين ابدأي سويه من الحين و طبعا يعتمد على ميزانيتك .

٦- شعرك اول الشهور فقط اهتمي فيه اما ماسكات طبيعيه غذيه او علاجات بالصالون و قبل زواجك ب ٣ شهور اذا بتصبغين شعرك لازم تكونين وصلتي للون اللي تبغينه و معتمدته م فجأه تصبغين قبل زواجك و يطلع شي ماتحبينه .

٧-قبل زواجك بشهرين لا تسوين شي جديد و تفاجأين بشرتك و تحوسينها .

٨- قبل زواجك بشهر تقدرين تعملين بوتكس او بلازما او تنظيف خفيف او اي من هالاشياء اللي تعمل نضاره مؤقته ، ماانصح تسوين اشياء عميقه ممكن بشرتك تتحسس منها .

٩- اذا تفكرين تسوين تقشير سويه قبل زواجك ب ٤ شهور عشان تقشر بشرتك و تعملين بعدها روتين مناسب لك و تستمرين عليه و لا يصير سبرايز ، و اذا بتسوين تنظيف عميق سويه قبل ب ٣ شهور عشان اذا طلع لك حبوب او علامات حبوب يمديك تعالجينها .

الفكرة تقسمين مشاكلك و تعالجينها سواء فالبيت او دكتوره و تاخذين الموضوع جدي مو اسبوع و تسحبين و تقولين ماشفت نتيجه اكيد لو اروح الدكتور بشوف نتيجه ، كلهم نفس النتيجه الفرق الاختيار الصح و الاستمرار و انتي تعرفين شخصيتك فمن البدايه سوي اللي تحسين بتمشين عليه و تستمرين .

اللي اقدر انصحك فيه من ناحية العنايه حاولي تعالجين المشكله اللي قاعده تقلل من ثقتك بنفسك مثلا تصبغات او سيلوليت او ترهل ، صح بعد الزواج بتحسين نفسك تافهه انك مره مكبره هالمواضيع لكن لو عالجتيها ثقتك بنفسك بتكون اكبر و اقوى .

من ناحية التجهيز

هنا كل شخص مهره يختلف عن الثاني لكن كلنا نقدر نتفق انه بيروج جزء منه على الفستان لانه يومك .

اول شي تقسمين اهم النقاط وتبدأين تجهزين اول مايجيك المهر

١- تحددين التاريخ

٢-تحددين اذا بيكون عائلي او كبير

٣-تحددين اذا بتسوينه فبيتك او صاله

٤- تحجزين الصاله بالتاريخ اللي حددتيه (كلمي اكثر من قاعه . روحي شوفيها و اكتبي قائمه بالاسعار )

٥-تختارين المصمم اللي بيسويلك فستانك او المحل اللي بتشترين فستانك منه (اعملي قائمه عشان تكتبين الاسعار و تختارين ) ولا تنسين الجزمة. انا فستاني سويته عن ASHISTUDIO

٦- تحددين مين بيصمم لك العرس wedding planner و هم بالعاده يمسكون لك كل الزواج من الالف للياء (كوشه و ترتيب القاعه ، و التقديمات ، البوفيه ،الاغاني … الخ فاكتبي كمان قائمه بالمصممين و باسعارهم )

٧- اذا انتي بتعملين عرسك لانه عائلي او حتى كبير بتحتاجين (كوشه ، ديكور للقاعه (كنب او كراسي او طاولات ) ورود ، تقديمات من حلى وقهوة وشاهي و عصيرات ، صبابات واللي يقدمون الحلى ، دي جي ، مكان للعبايات بارقام تاق ، زفه … الخ)

٨- حددي مين حابه يعمل التقديمات بزواجك الشوكلاته و الموالح غالبا يكون من المصمم نفسه لانه يتعامل مع محلات او اذا في شي فبالك كمان اقترحيه عليه .

٩-حددي مين بيحط لك مكياجك ومين بيسويلك شعرك وطبعا شعرك بيعتمد على فستانك و ستايله و احجزي ليوم زواجكوحده انتي متعوده عليها تسوي لك اظافرك .

١٠- تحجزين المصوره .

١١- تحجزين الدي جي او المطرب (تحتاجين الدي جي عشان يشغل لك الزفه و يرتب مع المغني اويمكن تبغين طقاقه او كلهم ) المهم انك تعملين قائمه باسعارهم و تختارين .

١٢- تصميم الكروت و طباعتها و تحديد عدد المعازيم

كل شي لازم ينكتب قدامك باسعاره و تقسمينه على حسب مهرك و احتياجك ، شخصيا زواجي كان عائلي جدا واعرف كثير حزت في خاطرهم ماانعزموا لانهم يحسبونه كبير خاصه انه كان في قاعة (قاعة نياره) فماتوقعوا يكون عائلي لكن مزاجي كان يبغى قاعه

نصيحتي لك وتمنيت احد نبهني وحرصني على هالنصيحه: استمتعي وانتي تجهزين لا تجهزين وانتي سترس ومستعجله ومتلخبطه لا لا استمتعي بكل لحظه لان بتتمنين ترجعينلها و تستمتعين ، وصوري كثير يومياتك ذكريات حتى لو سخيفه بس لمن ترجعينلها الشعور جميل و الاهم لمن تختارين مصور وريه صور انتي ودك فيها هذي غلطتي ماصورونس صور كنت ابغاها لاني نسيت اعلمهم ايش ابغا هذا اذا عندك ذوق معين ، زفتك امشي فيها على حبه ونص استمتعي بكل لحظه واطلعي وانتي مروقه هذا يومك وهذي حفلتك استمتعي فيها .

بعد التجهيزات المهمه تبدأين تقسمين احتياجاتك الثانيه :

ليوم العرس :

١- عبايه خاصه للعروسه اذا كنتي ماراح تشيلين فستانك انا شريت Cape لونه ابيض طويل و معاه طاقيه .

٢-فستان ثاني احتياط اذا بتغيرين من فستان العرس او اذا انكب عليه شي او اذا بتسافرين على طول

٣- ملابس داخليه لفستان العرس

٤-روب وشبشب لوقت تجهيزك كعروسه لمن يحطون لك مكياجك و يسون شعرك

٥- كريمات الجسم العطريه اللي تحبينها ، ومسك و دخون وعطرك المفضل .

٦-روجك المفضل او اللي بتحطينه بزفتك يكون في احتياط معاك .

٧- قميص نوم خاص لاول يوم ، اختاري شي بترتاحين له مو تكونين مستحيه من نفسك

لشهر العسل :

تقسمين احتياجك على حسب البلد اللي بتروحين لها

١- شنطة المكياج

٢-شنطة العنايه بوجهك و جسمك (هذا خلاص متعوده عليه من شهور )

٣- اذا تطلع لك حبوب فجاه لازم تكونين حاطه احتياطك من ماسك و كريم

٤-شنطة الشعر و منتجات الشعر

٥- شنطة الدلع ( كريمات عطريه ، مسك ، خمريه ، بودرة جسم ، عطور .. )

٦- ملابس لانجريه مثلا ٥ قطع لانك بتشترين وانتي بالسوق او اذا حسيتي تحتاجين اكثر خذي اكثر .

٧- ملابس بجامة عادي بس كيوت و نعوم وحرير او قطن ناعم Feminine

٨-رتبي ملابس الطلعه من بدري قبل لاتسافرين يعني اختاري قطع كامله مرتبه مع بعض عشان كل ماجيتي تطلعين كل شي جاهز ماتشيلين هم تلبقين ملابسك و كمان الجزم سواء كعب او فلات .

٩- ملابس داخليه لانجريه و كمان ملابس داخليه عاديه

١٠- اكسسواراتك .

١١- لاتنسين اهم شي شنطة المناطق الحساسه (حطي فيها كل احتياجاتك لهذي المنطقه ) حتى الملابس الداخليه الخاصه بوقت الدوره لا تنسينها .

١٢- شرااااب و روب مريح .

لازم تحطين ملابس خاصه لسهراتك معاه يعني بتروحون مطعم كشخه او Date Night خذي كم شي حلو و علي حسب البلد و اجواءهم .

ملابس سبورت و FUn يمكن سينما او شي تحتاجين تحسين كاجول بزياده .

بالاخير ملابسك و ايش تختارين المفروض مايطلع عن ستايلك المعتاد الفرق بينك و بين اللي مو عروسه فقط اللانجريه .

التجهيزات الباقيه لحياتك كعروسة

هنا كثير يختلفون ، انا شخصيا شريت كثير و ندمت لان شريت بالهوني مون و شريت لمن رجعت ولا كان عندي ملابس جاهزه بس لان مزاجي تغير لمن جيت البسهم فلا تكثرين نصيحة ، بكتب لكم الاساسيات اللي ليتني شريتها و اكتفيت احس تراكمت عندي اشياء عالفاضي .

الاساسيات اللي تحتاجين تشترينها :

١- عبايات (يوميه – عزايم )

٢-ملابس تحت العبايه مرتبه (فساتين او بنطلونات ) احتياط ماتردين متى تحتاجينها

٣-جزم اساسيه سواء كعب او فلات حاولي تختارين الوان اساسيه هذي نصحتيني فيها صاحبتي قالت خذي من كل براند لون اساسي مثلا اسود ، نود ، كحلي ، اخضر مثلا من ايفسان لورنتو ماسمعت كلامها و فعلا جت مناسبه مهمه ولا قدرت اطلع اشتريها و توهقت .

٤-ملابس عزايم (كم قطعه ثقيله مرتبه ) (كم قطعه مرتبه لعزايم صغيره )

٥- ملابس زيارات مرتبه

٦-ملابس يوميه للبيت مرتبه

٧- ملابس طلعه بنطلونات او توب او فساتين

٨- ملابس داخليه و بجامات

٩- عطورات

طبعا كل اللي كتبته اقصد اشياء بسيطه مو تخلصين السوق لانك بالاخير كل شهر كل ماطلعتي بتشترين ، الشي المهم بكل هذا هي ملابس الزيارات و العزايم لان غالبا تصير فجأة من اهل العريس و على حسب حياته .

نصيحتي لك ياعروستي

الزواج لازم ينبنى على اساسيات وقواعد ثابته (الاحترام ، الثقه ، التفاهم ، الصراحة) ، الحب اللي تشوفينه بالسوشل ميديا و الافلام هذا غير عن الواقع ، لمن تبدأين حياتك وانتي عارفه ايش المهم بالك بيكون مرتاح ، الحب مهم و هو نبض الحياة بس يكون اقوى و اجمل مع الاساسيات و لازم تجي من الطرفين مو من طرف واحد ، الزواج مشاركة وتعاون و اعتماد الاثنين على بعض .

اتمنى يعجبكم الموضوع حاولت اختصره لكم اذا عندكم استفسار ياريت تعلموني تحت الموضوع او بانستقرام

شكرا